Pas një hetimi të realizuar nga “Dailymail”, autoritetet britanike kanë arrestuar sërish shqiptarin Alket Dauti, i cili tashmë është shpallur fajtor për hyrje të paligjshme në Mbretërinë e Bashkuar.
38-vjeçari u vu në pranga një javë pasi Home Office zbuloi se ai kishte hyrë sërish në mënyrë të fshehtë në territorin britanik, vetëm disa muaj pas lirimit nga burgu në Belgjikë dhe deportimit drejt Shqipërisë.
Pista e rikthimit të tij në Britani u zbulua pasi Dauti publikoi në rrjetin social “TikTok” një video ku shihej duke drejtuar një makinë në rrugët e Londrës. Ndërkohë, edhe familjarët e tij kishin shpërndarë fotografi të tij ku dukej duke çuar dy vajzat në shkollë.
Arrestimi ndodhi pak ditë pasi “Dailymail” publikoi historinë e tij. Ai pranoi fajësinë për hyrje pa leje në territorin britanik, ndërsa gjykata pritet të japë vendimin përfundimtar për dënimin më 12 maj. Dënimi mund të arrijë deri në katër vite burg, pas së cilës ai pritet të dëbohet sërish nga vendi.
Dauti njihej si një figurë e rëndësishme e një grupi shqiptar që trafikonte emigrantë nga Belgjika drejt Britanisë, duke paguar shuma që varionin nga 8,000 deri në 13,000 paund për person, përmes rrugëve të fshehta me kamionë. Në vitin 2018 ai u arrestua në një banesë në Penge dhe u deportua drejt Belgjikës, ku ishte dënuar me dhjetë vite burg në mungesë.
Pasi u lirua vitin e kaluar dhe u dërgua në Shqipëri, Dauti u zhvendos sërish në Itali përpara se të rikthehej në Mbretërinë e Bashkuar.
