Çmimi i arit vazhdon marshimin drejt majave historike. Më 11 prill 2025, një onz ar tregtohej në vlerën e 3,218.35 dollarëve, vetëm disa orë pasi kishte kapur për herë të parë në histori nivelin e 3,219.40 dollarëve në bursën e Nju Jorkut.
Rritja e fundit vjen pas zhvillimeve të forta në frontin tregtar. Presidenti amerikan Donald Trump pezulloi përkohësisht disa tarifa, por paralelisht rriti në 145% taksat mbi mallrat kineze, duke e tensionuar më tej klimën mes dy fuqive më të mëdha ekonomike në botë. Kina, nga ana tjetër, u kundërpërgjigj duke vendosur tarifa prej 84% për disa produkte amerikane.
Këto lëvizje kanë sjellë luhatje në tregjet financiare. Pas një rritjeje të fortë të indekseve ditën e djeshme, Dow Jones dhe S&P 500 pësuan rënie sot pas hapjes, si pasojë e frikës nga një përshkallëzim i mëtejshëm i luftës tregtare.
Në këtë sfond, ari po konfirmon rolin e tij klasik si “aseti më i sigurt” financiar, ndërkohë që dollari amerikan po dobësohet dhe inflacioni në SHBA ka zbritur në 2.4%, duke ushqyer pritshmëritë për ulje të normave të interesit nga Rezerva Federale.
Ekspertët e shohin çmimin e arit të mbështetur nga disa faktorë: dobësimi i dollarit, blerjet masive nga bankat qendrore, veçanërisht nga Kina dhe India, dhe klima e pasigurt globale dhe gjeopolitike, që po i bën investitorët të orientohen gjithnjë e më shumë drejt këtij metali të çmuar.
