Një sherr mes dy vëllezërve dhe një personi tjetër në fshatin Fierseman të Divjakës degradoi në përdorimin e armës së zjarrit mbrëmjen e djeshme.
Rreth orës 20:00, pas një debati për motive pronësie, Zarif Konja, 58 vjeç dhe A.G., 57 vjeç, kanë goditur me grushte Shpëtim Konjën, 50 vjeç, i cili është vëllai i Zarif Konjës. Pas sherrit, Shpëtim Konja, ka gjuajtur me armën e gjahut të cilin e kishte me leje.
Policia ka njoftuar ditën e sotme se ka arrestuar në flagrancë Shpëtim Konjën për veprat penale “Kanosja”, “Dhuna në familje” dhe “Shkatërrimi i pronës”.
Ndërkohë, ka nisur procedimi penal në gjendje të lirë për shtetasin A. G., 57 vjeç, për veprën penale “Dëmtime të tjera me dashje”.
“Në lidhje me ngjarjen e mbrëmshme, në fshatin Fierseman, informojmë se në vijim të veprimeve procedurale, specialistët për Hetimin e Krimeve të Komisariatit të Policisë Divjakë bënë arrestimin në flagrancë të shtetasit Sh. K., 50 vjeç, për veprat penale “Kanosja”, “Dhuna në familje” dhe “Shkatërrimi i pronës”. Gjithashtu, nisi procedimi në gjendje të lirë për shtetasin A. G., 57 vjeç, për veprën penale “Dëmtime të tjera me dashje””, sipas njoftimit të policisë.
Policia vazhdon hetimet për zbardhjen e plotë të ngjarjes.
