“Kush e vrau Albanin?” Me këtë pyetje gazetari Luigi Pelaza i programit “Le Iene” që transmetohet në “Italia 1” i është rikthyer misterit të ekzekutimit me armë zjarri të 28-vjeçarit shqiptar Alban Gropçaj në Fortaleza të Brazilit në shkurt të 2019-ës.
Në 5 Maj do të zhvillohet në këtë vend seanca e parë gjyqësore dhe i akuzuar për këtë krim është biznesmeni italian Guido Bertola që dyshohet se organizoi vrasjen së bashku me të dashurën e tij braziliane.
I riu shqiptar punonte në kompaninë e italianit dhe së bashku kishin shkuar për çështje biznesi në Brazil.
Një mbrëmje teksa ktheheshin në banesë u ndalën nga 2 persona me motor dhe sipas biznesmenit italian pasi e nxorën atë nga makina qëlluan me 1 plumb 28-vjeçarin.
Por për gazetarët italiane kjo histori ka shumë pikëpyetje. Vëllai i të dashurës së biznesmenit i ka thënë policisë braziliane se i ka dhënë një zarf me të holla një nipi të tyre pak ditë para vrasjes, i cili u ekzekutua pak kohë më pas në rrethana të paqarta.
I lënë i lirë në Itali, biznesmeni Guido Bertola në prani të avokatit mohon çdo akuzë.
“Ishte si i familjes. Të gjithë e donin. Nuk e di kush e vrau”, tha Bertola.
“Le Iene” ngre dyshime se shqiptari u eliminua për shkak të kundërshtimeve të lidhjes jashtëmartesore të biznesmenit italian.
