Shtetet e Bashkuara do të rimarrin Kanalin e Panamasë nga ndikimi kinez, ka deklaruar të martën sekretari amerikan i Mbrojtjes, Pete Hegseth, gjatë një vizite të rrallë në vendin të cilin presidenti amerikan, Donald Trump kërcënon vazhdimisht se do ta rimarrë.
Reuters raporton se Hegseth, pas bisedimeve me qeverinë e Panamasë, është zotuar të thellojë bashkëpunimin dhe ka thënë se Kina nuk do të lejohej të “armatoste” kanalin duke përdorur marrëdhëniet tregtare të firmave kineze për spiunazh.
“Së bashku, ne do ta kthejmë Kanalin e Panamasë nga ndikimi i Kinës. Kina nuk e ndërtoi këtë kanal. Kina nuk e përdor këtë kanal dhe Kina nuk do ta armatosë këtë kanal. Së bashku me Panamanë në krye, ne do ta mbajmë kanalin të sigurt dhe të disponueshëm për të gjitha kombet”, është shprehur Hegseth.
Teksa Hegsethi ka folur për largimin e ndikimit kinez, Trump ka folur në terma më të gjerë duke kërcënuar se do të rimarrë kanalin dhe nuk ka përjashtuar përdorimin e forcës ushtarake për ta bërë këtë.
Trump ka pretenduar se Kina po operon në kanal, diçka që edhe Hegseth tha të martën se nuk ishte e vërtetë.
