Policia e Fierit ka dalë me një komunikatë në lidhje me sherrin e dhunshlm të regjistruar mbrëmjen e kësaj të marte në Divjakë, që degradoi deri në përdorimin e armëve të zjarrit. Ngjarja ka ndodhur rreth orës 20:00, në fshatin Fierseman.
Autoritetet thonë se shtetasi Zarif Konja, 58 vjeç dhe shoku i tij, shtetasi A. G., 57 vjeç, kanë rrahur me grushte shtetasin Shpëtim Konja, 50 vjeç (vëllai i Zarif Konjës).
Pasi është dhunuar nga i vëllai, raportohet se shtetasi Shpëtim Konja ka qëlluar me armën e gjahut të cilën e kishte me leje, ku për pasojë është dëmtuar mjeti i shtetasit A. G.
Policia bën me dije se ka shoqëruar në komisariat shtetasin Shpëtim Konja, ndërsa ka shpallur në kërkim vëllain e tij, Zarif Konja dhe shtetasin A.G. Dyshohet se shkaku i konfliktit mes vëllezërve ka qenë për çështje pronësie.
Policia thotë se grupi hetimor po punon për zbardhjen e plotë të rrethanave të ngjarjes dhe kapjen e shtetasve të shpallur në kërkim.
