Dy vëllezër janë përfshirë në një konflikt të dhunshëm me njëri-tjetrin mbrëmjen e kësaj të marte, teksa sherri ka degraduar deri në përdorimin e armëve të zjarrit. Ngjarja mësohet se ka ndodhur në Fier-Seman njësia administrative Gradishtë, bashkia Divjakë.
Burime bëjnë me dije se shtetasit Zarif dhe Shpëtim Konja, banues në këtë zonë, janë përfshirë fillimisht në një sherr fizik, ku kanë goditur njëri-tjetrin me grushte.
Pas sherrit me grushte, Zarif Konja ka qëlluar me armë zjarri ndaj vëllait të tij, por fatmirësisht Shpëtimin nuk është prekur nga të shtënat. Pas ngjarjes, vëllai që ka qëlluar me armë është larguar nga vendi i krimit në drejtim të paditur.
Policia ka sekuestruar në vendin e ngjarjes një armë gjahu dhe katër gëzhoja. Mësohet se nga të shtënat janë dëmtuar një mjet i parkuar në anë të rrugës dhe tenda e një lavazhi.
Vëllai tjetër Shpëtim Konja është shoqëruar nga Policia për të sqaruar rrethanat e konfliktit. Nga ana tjetër mësohet se grupi hetimor po merr në pyetje persona të tjerë që kanë qenë dëshmitarë të ngjarjes ose që mund të kenë dijeni.
Ende nuk janë të qarta arsyet që çuan në përplasjen e dhunshme mes dy vëllezërve Konja.
