Një i mitur, rreth 12 vjeç, ka qëlluar me armë zjarri në ajër në rrugë pranë ndërtesave në zonën e Farkës së Madhe në Tiranë. Pamjet u shpërndanë fillimisht në rrjetin social Snapchat nga një bashkëmoshatar i tij dhe më pas u publikuan edhe në media.
Lidhur me rastin në fjalë ka reaguar edhe Policia e Tiranë, ku bën me dije se ka proceduar penalisht në gjendje të lirë babain e të miturit, shtetasin B. X., 53 vjeç. Sipas bluve të kryeqytetit, i mituri ka qëlluar në ajër me pistoletë manovër, e cila është sekuestruar së bashku me 14 fishekë manovër.
“Specialistët për Hetimin e Krimeve të Komisariatit të Policisë Nr. 1 referuan materialet në Prokurori, ku nisi procedimi në gjendje të lirë për shtetasit: – B. X., 53 vjeç, pasi në një video të postuar në portalin “JOQ”, shfaqet djali i tij 12 vjeç, duke qëlluar në ajër, me pistoletë manovër. Ky send u gjet nga Policia dhe u sekuestrua me cilësinë e provës materiale, bashkë me 14 fishekë manovër.” – thuhet në njoftimin e Policisë.