Seanca e planifikuar për t’u mbajtur ditën e sotme në Gjykatën e Posaçme për ish-ministrin e Shëndetësisë, Ilir Beqaj, në lidhje me aferën e sterilizimit, është shtyrë për në një datë tjetër.
Shkak është bërë mungesa e Beqajt, i cili nuk është paraqitur në seancës për arsye shëndetësore, teksa ka bërë kërkesë që seanca të mos zhvillohej pa praninë e tij, kërkesë e cila është pranuar nga GJKKO.
Gjithashtu, në seancën e sotme mungonte edhe avokati i Ilir Beqajt. Seanca e radhës është caktuar për t’u mbajtur më 17 Prill.
Ilir Beqaj është marrë i pandehur nga SPAK për veprën penale vjedhje duke shpërdoruar detyrën në kuadër të grupit të strukturuar kriminal. Gjykimi ndaj Ilir Beqajt po vazhdon me procedura të zakonshme, pasi nuk pranoi gjykimin e shkurtuar, duke pretenduar se do të rrëzojë akuzën e ngritur nga GJKKO.
Të pandehur për aferën e sterilizimit janë marrë edhe ish-zv.ministri Klodian Rjepaj, biznesmenit Ilir Rrapaj dhe anëtarët e Komisionit të Vlerësimit të Ofertave: Marsela Serjani, Saimir Kadiu, Petref Mersini, Arben Gjata, Genc Burazeri dhe Naile Ajazi (Abazi).
Hetimet gati 3-vjeçare të kryera nga SPAK kanë zbuluar shkelje të ligjit në procedurat e dhënies së njërit prej koncesioneve më të kushtueshme të sektorit të shëndetësisë, me qëllimin e vetëm të shpalljes fitues të kompanisë së Ilir Rrapajt dhe shtetasit Italian, Umbro Staccini. Referuar hetimeve, vlera e koncesionit që llogaritet rreth 100 milionë euro, është fryrë fiktivisht dhe dhjetëra milionë euro. Para që deri më tani, prokuroria nuk e ka zbuluar se në xhepat e kujt kanë shkuar.
Në lidhje me këtë dosje, SPAK lëshoi urdhër-arreste vetëm Klodjan Rrjepajn dhe Ilir Rrapajn në Gushtin e vitit të kaluar, por Ilir Beqaj u arrestua më vonë. Ai u vu në pranga në fillim të muajit korrik në lidhje me abuzimin me fondet e Bashkimit Europian gjatë kohës që ish-ministri drejtonte Agjencinë Shtetërore të Programimit Strategjik dhe Koordinimit të Ndihmës (SASPAC).
