Tirana dhe Partizani do të përballen më 7 prill në Arenën Kombëtare, në orën 20:00 në derbin e katërt dhe të fundit për këtë sezon.
Kjo do të jetë ndeshja e 178-i në historinë mes dy klubeve teksa statistikat flasin në favor të Partizanit, ku në 177 takimet e mëparshme ka fituar 73 dhe ka barazuar 57 prej tyre.
47 janë fitoret e bardhebluve. Të dyja skuadrat synojnë që në takimin e 7 prillit të sigurojnë fitoren e parë në derbi në këtë sezon.
Edhe golavarazhi flet në favor të Partizanit, që ka detyruar rivalin ta nxjerrë plot 237 herë topin nga rrjeta, kundrejt 189 golave të Tiranës.
Por, Tirana ka edhe një detyrë të vështirë ditën e hënë. Përpos pikëve që jan si oksigjen për mbijetesën, bardheblutë po kërkojnë që të “thyejnë” Partizanin pas plot 11 takimesh.
Tirana nuk fiton në një derbi që prej vitit 2022. Asokohe, Tirana fitonte me rezultatin 2-0, ku Redon Xhixha me dopietën e tij do t’i jepte 3 pikët e fundit Tiranës përballë rivalit të tyre të përjetshëm.
Megjithatë, bardheblutë mund të krenohen me numrin e titujve të fituar, 26 kundrejt 17 të Partizanit. Por, si për ironi të fatit, skuadrat këtë sezon luftojnë për objektiva të ndryshëm.
Tirana synon të qëndrojë mes më të mirëve në Superiore, teksa aktualisht ndodhet në vendin e fundit në klasifikim me vetëm 32 pikë pas 32 javësh, ndërsa nga krahu tjetër Partizani ndodhet në vendin e 4-të në klasifikim me 47 pikë dhe kërkon rikthimin te titulli pas 2 vitesh.