Një ngjarje e rëndë u shënua në orën 14:30, pranë një lokali i njohur me emrin ‘Bezhi’, në autostradën Lezhë-Tiranë.
Disa persona që mbërritën me një automjet në biznesin përgjatë autostradës kanë marrë me forcë shtetasin Dodë Gjoka, rreth 35-vjeç, në parkingun e lokalit dhe janë larguar menjëherë.
Tre personat që kanë dhunuar dhe më pas kanë marrë me forcë në automjet 35-vjeçarin Dodë Gjoka janë identifikuar si : K. P., B. V. dhe Xh. E., të tre banues në fshatin Tresh.
Të gjendur nën presionin e kontrolleve intensive të Policisë, autorët dyshohet se e kanë zbritur nga automjeti 35-vjeçarin Dodë Gjoka i cili aktualisht po merr ndihmë mjekësore në spitalin e Lezhës dhe është jashtë rrezikut për jetën.
Mësohet se i riu ka dëmtime në pjesë të ndryshme të kokës dhe trupit.
Policia ka ngritur pika kontrolli në perimetrin rrethues dhe në akset lidhëse, me qëllim kapjen e autorëve. Gjithashtu, u ngritën pika kontrolli në akset rrugore drejt Tiranës, Shkodër dhe Kukësit.
Dodë Gjoka rezulton të jetë një punonjës i sigurisë në HEC-in e Kaçinarit, në Mirditë.
Rrëmbimi i tij vjen disa ditë pasi banorët e Kaçinarit protestuan kundër ndërtimit të HEC-it.
“Rreth orës 14:30, në vendparkimin e automjeteve të një lokali në aksin rrugor “Lezhë-Milot”, dyshohet se gjatë një konflikti fizik, tre shtetas kanë dhunuar dhe më pas kanë marrë me forcë me automjet, shtetasin D. Gj., rreth 35 vjeç, banues në Lezhë.
Menjëherë pas marrjes së njoftimit, shërbimet e Policisë së Lezhës kanë ngritur pika kontrolli në perimetrin rrethues dhe në akset lidhëse, me qëllim kapjen e autorëve, të cilët janë identifikuar nga Policia, konkretisht shtetasit K. P., B. V. dhe Xh. E., të tre banues në fshatin Tresh.
Gjithashtu, u ngritën pika kontrolli në akset rrugore drejt Tiranës, Shkodër dhe Kukësit.
Si rezultat i reagimit të menjëhershëm të Policisë dhe të gjendur nën presionin e kontrolleve intensive të Policisë, autorët dyshohet se e kanë zbritur nga automjeti, shtetasin D. Gj., i cili aktualisht po merr ndihmë mjekësore në spitalin e Lezhës dhe është jashtë rrezikut për jetën.”– njofton policia.
Grupi hetimor, në drejtimin e Prokurorisë, po punon për sqarimin e rrethanave dhe dokumentimin ligjor të rastit.
