Analisti Fatos Lubonja ka komentuar incidentin e hakerimit të e-maileve të SPAK, duke theksuar pasojat e këtij sulmi. Ai ka pohuar se sulmi ka ardhur nga individë që kanë pasur funksione shtetërore, një fakt që, sipas tij, tregon një degradim të institucioneve dhe një kërcënim për pavarësinë e SPAK.
Lubonja ka sugjeruar se mund të ketë arsye të ndryshme për këtë sulm dhe ka theksuar se SPAK duhet të hetojë me kujdes dhe të zbulojë shkakun e tij.
Ai gjithashtu theksoi se individët që janë përfshirë në këtë ngjarje nuk duken të jenë pjesë e një strukture tepër të organizuar, duke shtuar se edhe ata që mund të kenë dhënë urdhër për sulmin, mund të kenë një mendësi kriminale.
“Të arrestuarit kanë pasur funksione shtetërore. Një sulm nga persona shtetëror ndaj një institucioni të pavarur është një farë degradimi. Arsyet mund të jenë të shumta dhe SPAK duhet të gjejë arsyen. Derisa i arrestuan, tregon se këta nuk janë aq shumë të strukturuar. Një drejtor s’mund të hyjë aty thjesht për kuriozitet, flet për mendësinë tepër kriminale që mund të kenë. Mund të jetë kërkuar kjo punë nga persona të tjerë. Edhe ata që mund ta kenë kërkuar më duken tepër të cunguar”, tha ai në emisionin Open në News24.