Juristi Ylli Manjani ka folur këtë të enjte në Euronews Albania lidhur me njoftimin që SPAK bëri për një tentativë të paligjshme për të ndërhyrë në adresat e e-maileve të prokurorëve të kësaj strukture.
Manjani tha se për këtë çështje nuk ka situatë hakërimi. Sipas tij, shqetësuese në këtë mes është nxjerrja e hetimeve në media.
“Përdorimi i mjeteve elektronike nuk është i sigurtë. Nuk besoj që ka hakerim në SPAK, ka nxjerrje të dhënash siç është bërë gjithmonë gjithë këto vite. SPAK nuk ka dhënë ende shpjegim pse të dhënat e Sky Ecc janë në media, pse përgjimet e Ilir Beqjas janë në media.
Sa i përket hakërimit që përflitet në një sistemi të brendshëm të kompjuterave, në momentin që janë nxjerrë, avokatët s’kanë pasur dijeni fare. Nuk është hakerim, i kanë nxjerrë vetë ata.
Shqetësimi është nxjerrja hetimore në media dhe SPAK-u është përgjegjës për këtë. Së dyti dje ka patur një seancë dëgjimi në Gjykatën Kushtetuese për këtë çështje, pra media në raport me sekretin. Aty prokurorët e SPAK kanë deklaruar se gazetarët që kanë në dorë dokumente sekrete, të pyesin vetë prokurorët janë apo jo sekrete për t’iu dhënë lejen e botimit apo jo. Kjo është poshtërsi.
Debati dje në Gjykatë ku pozicioni zyrtar i SPAK ishte censura paraprake, është skandaloz. Këtu nuk na i nxjerrin kompjuterat të dhënat, i nxjerrin njerëzit”, tha Manjani.