Agjencia e Kombeve të Bashkuara për Fëmijët thotë se të paktën 322 fëmijë raportohet të jenë vrarë që kur Izraeli nisi një ofensivë të përtërirë në Gaza dy javë më parë. Unicef tha se të paktën 609 fëmijë të tjerë u plagosën gjatë së njëjtës periudhë.
“Armëpushimi në Gaza siguroi një litar shpëtimi dëshpërimisht të nevojshëm për fëmijët e Gazës dhe shpresë për një rrugë drejt rimëkëmbjes”, tha Drejtoresha Ekzekutive e Unicef, Catherine Russell. “Por fëmijët janë zhytur përsëri në një cikël dhune vdekjeprurëse dhe privimi.”
Izraeli nisi ofensivën e tij të ripërtërirë në Gaza më 18 mars, duke fajësuar Hamasin për refuzimin e një propozimi të ri të SHBA-së për të zgjatur armëpushimin dhe për të liruar 59 pengjet ende të mbajtur rob në Gaza.
Hamasi, nga ana tjetër, akuzoi Izraelin për shkeljen e marrëveshjes fillestare për të cilën kishin rënë dakord në janar.
Unicef tha se “bombardimet e pamëshirshme dhe pa dallim” kishin rifilluar në Gaza, me 100 fëmijë të vrarë ose të gjymtuar çdo ditë në 10 ditët deri më 31 mars.
Shumica e fëmijëve që u vranë ishin zhvendosur dhe ishin strehuar në tenda të improvizuara ose shtëpi të dëmtuara, tha ai.
Unicef përdor shifrat e publikuara nga ministria e shëndetësisë e drejtuar nga Hamasi në Gaza – shifra të cilat Izraeli i ka kundërshtuar vazhdimisht. Shifrat shihen nga OKB-ja dhe institucionet e tjera ndërkombëtare si të besueshme.
Gazetarët ndërkombëtarë, përfshirë BBC-në, janë të bllokuar nga Izraeli për të hyrë në Gaza në mënyrë të pavarur, kështu që nuk janë në gjendje të verifikojnë shifrat nga asnjëra palë.
Që nga fillimi i luftës më shumë se 18 muaj më parë, agjencia tha se 15,000 fëmijë raportohet se janë vrarë, mbi 34,000 thuhet se janë plagosur dhe gati një milion fëmijë janë zhvendosur vazhdimisht.
Situata humanitare në të gjithë Gazën është përkeqësuar në mënyrë dramatike javët e fundit, me Izraelin që refuzoi të lejojë ndihmat në Rripin e Gazës që nga 2 marsi – bllokimi më i gjatë i ndihmave që nga fillimi i luftës.
“Pa këto furnizime thelbësore, kequshqyerja, sëmundjet dhe kushtet e tjera të parandalueshme ka të ngjarë të rriten, duke çuar në një rritje të vdekjeve të parandalueshme të fëmijëve”, shkroi Unicef në një deklaratë për shtyp.
OKB-ja njoftoi se po reduktonte operacionet e saj në Gaza më 24 mars, një ditë pasi tetë mjekë palestinezë, gjashtë reagues të parë të Mbrojtjes Civile dhe një anëtar i stafit të OKB-së u vranë nga forcat izraelite në Gazën jugore.
IDF nisi një fushatë për të shkatërruar Hamasin, i cili është njohur sigrup terrorist nga Izraeli, Britania e Madhe, dhe SHBA, në përgjigje të një sulmi të paprecedentë ndërkufitar më 7 tetor 2023, në të cilin rreth 1200 njerëz u vranë dhe 251 u morën peng.
Më shumë se 50,399 njerëz janë vrarë në Gaza gjatë luftës që pasoi, sipas ministrisë së shëndetësisë të drejtuar nga Hamasi.
