Kryeministri izraelit Benjamin Netanyahu ka deklaruar se Izraeli është gati të negociojë për dhënien fund luftës në Gaza, por vetëm nëse Hamasi dorëzon armët dhe heq dorë nga kontrolli i enklavës së rrethuar.
Duke folur në fillim të një takimi javor të kabinetit, Netanyahu tha se Izraeli është i gatshëm të diskutojë një rezolutë përfundimtare sipas së cilës “udhëheqësit e Hamasit do të lejohen të largohen, ne do të garantojmë sigurinë e përgjithshme në Rripin e Gazës dhe do të mundësojmë zbatimin e planit të Trump për emigracionin vullnetar”.
Netanyahu tha se kabineti i sigurisë kishte vendosur brenda natës të përshkallëzojë presionin ushtarak. Duke mohuar akuzat se qeveria nuk i jep përparësi kthimit të pengjeve, Netanyahu tha: “Ne po punojmë dhe synojmë t’i kthejmë ata. Deri më tani, kombinimi i presionit ushtarak dhe politik ka qenë faktori i vetëm që ka siguruar lirimin e pengjeve.”
Kryeministri izraelit shtoi më tej se presioni ushtarak ndaj Hamasit po rezultonte efektiv, duke dobësuar aftësitë ushtarake dhe qeverisëse të grupit, ndërsa krijonte kushte për lirimin e pengjeve izraelite.
Ndër të tjera, Netanyahu ka shprehur mbështetjen për veprimet ushtarake të SHBA-së kundër Houthi-ve të Jemenit duke thënë se kanë aleancë me fuqinë më të madhe në botë, duke nënkuptuar se qëndrojnë pas tyre pa rezerva.
“Ne kemi një aleancë me fuqinë më të madhe në botë dhe ajo qëndron pas nesh atje dhe në arena të tjera pa rezerva.”, është shprehur ai.
Izraeli rifilloi bombardimet intensive të territorit palestinez më 18 mars dhe më pas nisi një ofensivë të re tokësore, duke i dhënë fund një armëpushimi gati dy mujor në luftën me Hamasin që grupi militant palestinez ndezi me sulmin e tij të 7 tetorit 2023.
Të premten, Izraeli kreu një sulm ajror në Bejrut, i pari i tij që nga nënshkrimi i një armëpushimi me Hezbollahun në nëntor. Gjithashtu, bombardimet në Gaza nuk u ndalën as pët Fitër Bajram.
Përshkallëzimi ka ngritur shqetësime për jostabilitet më të gjerë rajonal, duke nxitur komunitetin ndërkombëtar të dënojë dhunën dhe të bëjë thirrje për përmbajtje.
