Një 20-vjeçar zvicerian është arrestuar nga Policia e Tiranës, pasi ka vjedhur me dhunë një aparat celular në rrugën e Barrikadave.
Ngjarja ndodhi ditën e djeshme, kur i riu, i identifikuar si J. K., ndoqi një 52-vjeçar teksa ky i fundit po kthehej në banesë. Pas një konflikti fizik, 20-vjeçari arriti t’i merrte telefonin dhe u largua.
“Shërbimet e Komisariatit të Policisë Nr. 3, ditën e djeshme, pas informacionit të marrë se në Rrugën e Barrikadave, një shtetas, ka vjedhur me dhunë aparatin celular një 52-vjeçari, kanë organizuar punën për identifikimin dhe kapjen e autorit të dyshuar.
Si rezultat i hetimeve të shpejta hetimore dhe profesionale të kryera nga specialistët për Hetimin e Krimeve të Komisariatit të Policisë Nr. 3 është lokalizuar dhe arrestuar shtetasin e huaj zvicerian J. K., 20 vjeç.
Ditën e djeshme, ky shtetas ka ndjekur 52-vjeçarin gjatë kohës që po kthehej për në banesë, dhe pasi e ka ndaluar është konfliktuar fizikisht me të dhe i ka marrë aparatin celularin. Aparati celular u gjet gjatë kontrollit fizik të ushtruar ndaj 20-vjeçarit“, thuhet në njoftimin e policisë.
Materialet procedurale i kaluan Prokurorisë, për veprime të mëtejshme.
