Miliona myslimanë festojnë sot Fiter Bajramin, ditën më të rëndësishme të kalendarit Islamik, e cila kurorëzon muajin e Shenjtë të Ramazanit.
Arabia Saudite dhe vende të tjera të gjirit e shënojnë festën këtë të diel, por në vende të tjera të lindjes së mesme Bajrami nuk do të festohet para së hënës.
Koha e kësaj feste përcaktohet në varësi të kalendarit hënor mysliman. Mbi 120 mijë besimtarë zhvilluan lutjet e mëngjesit në xhaminë e Al Aksës në Jerusalem, me rastin e Fiter Bajramit.
Al Aksa e cila gjendet në zemër të qytetit të vjetër të Jerusalemit, është zona e tretë më e shenjtë për myslimanët dhe përgjatë historisë është bërë shpesh arenë e përleshjeve mes izraelitëve dhe palestinezëve.
Palestinezët, që shënojnë Fiter Bajramin e dytë që prej nisjes së luftës me Izraelin, u mblodhën gjithashtu në xhaminë e dëmtuar rëndë të Khulafaa në Jabalia të dielën për tu falur mes shkatërrimit.
“Jemi këtu për Fiter Bajramin. Jemi këtu për të kremtuar ritualet e Zotit mes shkatërrimit dhe zhurmës së topave. Jemi në rrethana të vështira, por këmbëngulëm që të vijmë këtu e të lutemi. Njerëzit e tjerë po festojnë sot në paqe e qetësi, ne po e bëjmë mes shkatërrimit dhe bombardimeve”, thotë një grua palestineze.
“Ne do të falemi në të gjitha rrethanat. Edhe pse kemi kaq shumë martirë, kaq shumë viktima, të burgosur e të plagosur, ne do të festojmë. KJo është një ditë e madhe për ne”, shprehet një tjetër.
Mijëra besimtarë në Katar mbushën stadiumin ku në vitin 2022 u zhvilluan 8 ndeshje të kupës së botës, për të marrë pjesë në lutjet e mëngjesit, në fund të muajit të shenjtë të Ramazanit. Besimtarët bënë thirrje që pajtimi dhe vëllazëria të mbizotërojnë në të gjithë botën.
