Gjykata e Tiranës ka vendosur ditën e sotme që të kaloj për gjykim çështjen në ngarkim të të miturit Mario Përlleshi, , i cili akuzohet për vrasjen e 14-vjeçarit Martin Cani dhe plagosjen e bashkëmoshatarit të tij, Luis Meçe, krim i ndodhur vetëm pak metra larg shkollës “Fan Noli” më 18 nëntor në Tiranë.
Përlleshi është marrë i pandehur për kryerjen e veprës penale “Vrasje në rrethana cilësuese” ndaj një të mituri dhe kundër dy ose më shumë personave.
Gjyqtarja Migena Laska ka pranuar kërkesën e prokurorisë për gjykim të dosjes penale, teksa ka rrëzuar kërkesën për gjykim të shkurtuar të bërë nga 14-vjeçari.
Në sallë psikologia Lindita Hoxha është shprehur se është dakord që të vijojë gjykimi i zakonshëm për shqyrtim me të detajuar të çështjes në themel.
Kujtojmë se Prokuroria e Tiranës ka ndarë në një fraksion më vete aktet që lidhen me veprën penale “Shpërdorim i detyrës”, lidhur me veprimet apo mosveprimet e stafit të shkollës “Fan Noli”.
Organi i akuzës ka njoftuar se këto akte janë regjistruar në një procedim tjetër, dhe për të cilin hetimet vazhdojnë pasi është e domosdoshme kryerja e veprimeve të tjera hetimore, me qëllim individualizimin e fajësisë dhe përgjegjësive penale konkrete.
Ngjarja ndodhi pas një sherri për motive banale mes të miturëve, teksa ata sapo kishin përfunduar mësimin mesditën e 18 Nëntorit të vitit të kaluar, teksa të pranishlm në konflikt kanë qenë dhe disa të mitur të tjerë.
Nga rezultati i akt-ekspertimit mjekoligjor të thikës së përdorur në krim, nga gjurmët e gjakut janë zbuluar dy profile ADN-je. Një prej profileve të ADN-së përputhej me viktimën Martin Cani, ndërsa profili i dytë përputhej me atë të të plagosurit Luis Meçe.
Gjithashtu, nga akt-ekspertimit mjekoligjor ka rezultuar se thika është përdorur vetëm nga autori i dyshuar i krimit, 14-vjeçari Mario Përlleshi.
Edhe ky i fundit, gjatë përleshjes mbeti i plagosur në parakrah, teksa aktualisht ndodhet në institutin e të miturve në Kavajë, në masën “Arrest në burg”.
