Detaje të reja janë mësuar nga operacion i ndihmës dhe riatdhesimit në Shqipëri të një të riu 19-vjeçar i cili ishte rrëmbyer në Sierra Leone.
Policia e Shtetit, përmes një njoftimi publik bën me dije, se ndërhyri pas një kërkese nga Ministria për Evropën dhe Punët e Jashtme, e cila kishte marrë një apel ndihme nga nëna e të riut. Ajo pretendonte se djali i saj ishte rrëmbyer në Freetown dhe më pas kishte arritur të shpëtonte duke kërkuar ndihmë në stacionin e policisë lokale.
‘Menjëherë, Policia e Shtetit organizoi punën për dërgimin e punonjësve të Policisë (nga Interpol Tirana dhe nga Reparti Special RENEA) në Sierra Leone, me qëllim shoqërimin e 19 vjeçarit, duke bashkëpunuar ngushtësisht me Ministrinë për Evropën dhe Punët e Jashtme për procedurat e pajisjes me vizë hyrëse dhe me oficerin e kontaktit të Policisë së Shtetit të atashuar pranë Ambasadës shqiptare në Londër/Mbretëria e Bashkuar’, njofton policia.
Duke marrë parasysh gjendjen e rënduar emocionale të të riut dhe nevojën për një riatdhesim të sigurt, Policia e Shtetit organizoi një operacion të posaçëm. Në këtë kuadër, oficerë të specializuar nga Interpol Tirana dhe Reparti Special RENEA u dërguan në Sierra Leone për ta shoqëruar të riun nga Freetown në Tiranë.
Operacioni u zhvillua në bashkëpunim të ngushtë me Ministrinë për Evropën dhe Punët e Jashtme, Interpol Freetoën dhe oficerin e kontaktit të Policisë së Shtetit pranë Ambasadës shqiptare në Londër. Falë koordinimit të autoriteteve, kthimi i 19-vjeçarit në Shqipëri u realizua pa asnjë problem.
Lexo edhe:
Ndodhej në rrezik në Sierra Leone, riatdhesohet në Shqipëri 19-vjeçari
