Deputetja e Partisë së Lirisë, Monika Kryemadhi, gjatë një interviste për emisionin “Opinion” ka hedhur akuza të forta për ish-kryedemokratin Lulzim Basha.
Kryemadhi tha se kunati i Bashës është i përfshirë në projektin e Portit të Durrësit, ku merret me marketingun e shitjeve të apartamenteve, teksa shtoi se njerëzit e Bashës, nëpërmjet zyrës së kryeministrit, kanë bërë biznes në Ukrainë. Gjithashtu, ajo aludoi dhe për një hetim nga autoritetet holandeze për Lulzim Bashën.
Monika Kryemadhi: Zoti Basha për mua është sjellje e shitur
Blendi Fevziu: Unë nuk mund ta konsideroj të shitur, se një kryetar opozite që e ble kryeministri, i ve deputetët në rresht.
Monika Kryemadhi: Po patjer se mjafton të shikoj “turn over-in” e bizneseve të ish-kryetarit të opozitës, zotit Basha, do ta kuptoni se kush e ka blerë.
Blendi Fevziu: Pse ka biznese zoti Basha?
Monika Kryemadhi: Në qoftë se ju nuk i dini, ia u themi edhe ne, duke filluar që nga projekti i Portit të Durrësit…
Blendi Fevziu: Zoti Basha te projekti i Portit të Durrësit, aty është Alabari?
Monika Kryemadhi: Po kunati dhe për të vazhduar pastaj në shumë gjëra të tjera që nëse s’i dini…
Blendi Fevziu: Zoti Basha është në projektin e Portit të Durrësit?
Monika Kryemadhi: Bashkëpunëtorët e zotit Basha janë ata që merren jo vetëm në marketingun e shitjeve të apartamenteve me pamje nga mali apo me pamje nga deti, apo për të vazhduar dhe me shumë projekte të tjera, që nëpërmjet zyrës së kryeministrit, kanë bërë biznese pranë zotit Basha në Ukrainë apo dhe me shumë projekte të tjera.
Blendi Fevziu: Në Ukrainë?
Monika Kryemadhi: Po patjetër! Mbani mend që këtë në këtë studio para 4 vjetësh qeshnin të gjithë me denoncimin tim për inceneratorit dhe sot ne ja ku jemi.
Blendi Fevziu: Mesa mbaj mend unë as PD-ja vetë nuk donte që ju të ishit atëhere këtu në studio
Monika Kryemadhi: Unë asnjëherë nuk gaboj dhe nuk po them gjëra që janë të pavërteta. Pavarësisht nga kjo, edhe historia e zotit Basha, siç i erdhi zotit Erion Veliaj radha, do t’i vijë dhe Bashës radha. Unë shpresoj që qeveria holandeze të ketë mbaruar me hetimin se me çfarë jeton bashkëshorti i zonjës Basha në Shqipëri dhe me çfarë funksionon partia e tij.
