Mediat në Kosovë kanë publikuar disa pamje nga ngjarja e rëndë e regjistruar këtë të hënë në fshatin Stanoc të Vushtrrisë, në Kosovë, ku një burrë vrau me armë zjarri një grua dhe më pas veten.
Më konkretisht, pronari i furrës së bukës “Diellza”, 58-vjeçari Arsim Morina vrau ish-punëtoren e biznesit të tij, 42-vjeçaren Nexhmije Haradinaj dhe më pas qëlloi edhe veten.
Ngjarja dyshohet se ka ndodhur në një nënkalim, teksa nga pamjet shihen viktimat të shtrirë në tokë, pranë njëri-tjetrit.
Sipas një të afërmi të 42-vjeçares, shkak i vrasjes dyshohet se ka qenë xhelozia e pronarit, pasi viktima Nexhmije Haradinaj kishte lënë punën te furra dhe kishte nisur të punonte diku tjetër.
“Nuk ka pasur ndonjë lidhje familjare. Ka qenë grua shembullore. Para një kohe kanë qenë punëtore e këtyre me gjithë bashkëshortin por rrethanat se si kanë ardhë deri te vrasja nuk i dijmë as ne si familje. Kërkojmë mirëkuptimin e juaj që familjarët të mos shqetësohen. Gruaja ka qenë rreth të 40-ave, probleme nuk ka pasë…Dhashtë Zoti të jetë viktima e fundit. Sipas një informate xhelozia se përse ke shku te një tjetër vend me punue dhe jo te unë”, ka thënë Rrahim Ajeti, familjar i viktimës.
Prokuroria Themelore e Mitrovicës ka bërë të ditur se janë duke u marrë në pyetje dëshmitarë dhe se në koordinim me policinë po hetohen të gjitha rrethanat që kanë çuar në këtë ngjarje të rëndë.
