Një kapsulë SpaceX Crew Dragon është ankoruar me sukses në Stacionin Ndërkombëtar të Hapësirës (ISS), duke i hapur rrugën kthimit të astronautëve Butch Wilmore dhe Suni Williams në Tokë, pas një qëndrimi të zgjatur prej më shumë se nëntë muajsh.
Dy astronautët amerikanë duhej të kalonin vetëm tetë ditë në ISS si pjesë e një misioni testues të anijes Starliner të Boeing, por probleme teknike me këtë mjet i detyruan të qëndrojnë shumë më gjatë. NASA vendosi të mos rrezikojë një kthim me Starliner, duke i kthyer ata me kapsulën e SpaceX.
NASA konfirmoi se udhëtimi i tyre i kthimit do të nisë brenda kësaj jave, por gjithçka varet nga kushtet atmosferike. “Butch dhe Suni kanë bërë një punë të shkëlqyer dhe mezi presim t’i rikthejmë në shtëpi,” deklaroi Steve Stich, menaxher i programit të ekuipazhit komercial të NASA-s.
Misioni i Starliner kishte pësuar vonesa për vite me radhë për shkak të problemeve teknike. Edhe gjatë fluturimit të tij të parë me ekuipazh, anija u përball me defekte serioze, përfshirë rrjedhje helium dhe probleme me shtytësit, të cilat mund të rrezikonin rikthimin e astronautëve. Boeing këmbënguli se Starliner mund t’i kthente ata në Tokë, por NASA nuk pranoi të marrë asnjë rrezik.
Kthimi i astronautëve është kthyer edhe në një debat politik. Donald Trump e quajti situatën një “braktisje në hapësirë”, duke fajësuar administratën Biden, ndërsa Elon Musk deklaroi se vonesa kishte motive politike. NASA mohoi akuzat, duke theksuar se vendimi u bazua në sigurinë e ekuipazhit.
Pas një dorezimi dy-ditor të komandës në ISS, Butch Wilmore dhe Suni Williams do të nisin udhëtimin e tyre të shumëpritur për në Tokë.
