Shqipëria vijon të ketë ende akses në platformën Tik-Tok dhe pas datës 13 mars, datë kjo që u lajmërua nga qeveria dhe nga Autoriteti i Sigurisë Kibernetike se do të ishte fundi i aksesueshmërisë në këtë rrjet social.
Sipas asaj që Autoriteti i Sigurisë Kibernetike thotë për ‘Report TV’, bllokimi i përdorimit të rrjetit social Tik-Tok në Shqipëri është ende në fazat fillestare. Nga dita e djeshme e deri më sot mbi 1.5 milionë shqiptarë kanë raportuar problematika në “lundrimin” në këtë platformë.
Ata sqarojnë se u bërë kërkesë kompanive të internetit për të bllokuar IP dhe DOMAIN të TikTok-ut, ndërsa autoritetet vendase duhet të përfundojnë procedurat e nevojshme me kompanitë Apple dhe Play Store që indivitët të mos kenë akses për ta shkarkuar në celularë. Gjithashtu Autoriteti i Sigurisë Kibernetike thotë se do të duhen të paktën 10 ditë për të mbyllur përfundimisht këtë aplikacion në shtetin shqiptar.
Por pavarësisht se kompanitë e internetit ndaluan lundrimin në Tik Tok, prej ditës së djeshme shqiptarët gjetën “zgjidhje” nëpërmjet “VPN”-ve të cilat kur aktivizohen ndryshojnë automatikisht IP dhe bëjnë të mundur aksesin në këtë rrjet social.
Por kjo tentativë e shqiptarëve pritet të marrë fund pasi “Apple” dhe “Play Store” të fshijnë plotësisht aplikacionin Tik Tok në territorin e vendit tonë.
