Gjykata e Elbasanit i ktheu për plotësim hetimesh prokurorisë, dosjen e dy rusëve dhe një ukrainasi, të cilët u kapën në uzinën e armëve në Gramsh, pas përplasjes me rojet ushtarakë.
Vendimi u mor tre ditë me parë në seancën paraprake gjyqësore, ku organit akuzues iu la afat kohorë deri në fund të muajit maj.
Svetlana Timofeeva e Mikahil Zorin, të moshave 34 dhe 23 vjeç, dy shtetas rusë, si dhe Fedir Alpatov, 24 vjeç, ukrainas, u arrestuan në datë 20 gusht të vitit 2022 pas një incidenti që u shënua brenda rrethimit të ish uzinës së armëve në Gramsh.
Pasi u arrestuan, ata thanë se janë blogerë të apasionuar pas godinave të braktisura dhe objekteve ushtarake, për këtë arsye vizituan uzinën në Gramsh, duke mohuar të jenë spiunë.
Prokuroria ngriti dyshimet për spiunazh me pretendimin se të tre ata kishin ardhur në vendin tonë për të mbledhur informacione ushtarake dhe strategjike të sigurisë kombëtare.
Tre të huajt po hetohen nga organi i akuzës pa masë sigurie.
