Prej ditës së sotme, qytetarët e verilindjes së Shqipërisë do të mund të përshkojnë të plotë “Rrugën e Arbrit”, e cila lidh Tiranën me Dibrën.
Këtë të premte, Qeveria ka inaguruar tunelin e Murrizit, me gjatësi 3.8 kilometra, e cila është dhe vepra më e rëndësishme e projektit.
Tuneli kryesor ka dy korsi lëvizje me 3.75 metra si dhe trotuare me gjerësi 1.5 metra. Ai lidhet me tunelin e emergjencës me anë të 11 galerive.
Me hapjen e tunelit të Murrizit për qarkullimin e mjeteve, pas 6 vitesh punimesh, udhëtimi nga Tirana në Dibër dhe anasjelltas, pritet të jetë rreth 2 orë dhe është i ndërtuar me strukturë hekuri dhe jo guri apo gërmimi.
Ndërtimet janë kryer nga kompania “Gjoka Konstruksion”, e cila është fituese e koncesionit. Vepra nisi në vitin 2019 dhe hapja e saj u shty disa herë për shkak të tërmetit, pandemisë dhe “vështirësive gjeologjike”.
Projekti nis nga dalja verilindore e Tiranës në “Shkallën e Tujanit” drejt Maqellarës në dalje të fshatit Bllatë në kufi me Maqedoninë e Veriut për një total prej rreth 73.5km. Ai përfshinte gjashtë tunele dhe dy ura të larta.
Sipas Qeverisë, kalimi në këtë aks rrugor do të jetë pa pagesë për qytetarët. Në muajin Prill pritet të inagurohet edhe segmenti rrugor Maqellarë-Peshkopi.
Rruga e Arbrit, përveçse shkurton kohën e udhëtimit dhe afron Dibrën me Tiranën, pritet të ketë ndikim edhe në zhvillimin turistik të zonave përreth, teksa shkurton edhe distancën mes Tiranës dhe Shkupit.
Me hapjen e tunelit të Murrizit, pritet të ulet dhe numri i aksidenteve, pasi Qafa e Murrizit ishte kthyer në një rrugë të rrezikshme, sidomos gjatë periudhave me reshje.
