Avokati Jordan Daci, i ftuar në emisionin “Të Paekspozuarit”, ka folur për procesin ndaj kryebashkiakut Veliaj.
Ai tha se Veliaj nuk ka ndonjë rol sot në Bashkinë e Tiranës edhe pse formalisht pritet të mbetet kryebashkiak pasi mbetet në vullnetin e Këshillit të Ministrave, pra qeverisë, për ta shkarkuar ose jo.
Daci shtoi se Veliaj është vetëm në fillim të procesit të tij dhe se do të “harrohet” në paraburgim me kalimin e kohës, siç ndodh me të gjithë.
“Juridikisht e kanë asgjësuar në Bashkinë e Tiranës. Formalisht mbetet kryetar i Bashkisë. Kjo edhe për shkak të një praktike të GJK, që kryetari i i Vaut të Dejës u shkarkua. Por tani nuk mund të shkarkohen pa patur vendim të formës së prerë.
Pjesa tjetër, në bazë të ligjit për pushteitn vendor, kur kryebashkiaku mungon tre muaj, normalisht Këshilli Bashkiak propozon shkarkimin pranë Këshillit të Minsitrave. Këshilli i Ministrave nuk ka ndërmend të marrë një vendim. Por do të shtrohet çështja nëse mungesa është me arsye apo pa arsye siç ndodhi me zotin Berisha për mandatin.
Pra ai do të vijojë formalisht si kryetar bashkie, por praktikisht është çarmatosur nga çdo gjë. Është dhënë komanda personave të tjerë. Do të fillojë që emri i tij të zvenitet komplet edhe brenda Bashkisë.
Është proces natyror, përtej orekseve që ndikojnë. Kur një person ndodhet në paraburgim fillojnë e harrojnë, përveç familjarëve.
Mendoj se ai është në fillimet e tij dhe shumë shpejt nuk do të jetë më i lidhur thelbësisht me Bashkinë e Tiranës”, tha Daci.
