Një ditë pas zyrtarizimit të listave për kandidatë për deputet për zgjedhjet e 11 majit, kryeministri Rama ka ironizuar opozitën, duke thënë se sot është zgjuar i mërzitur për shkak se Kujtim Gjuzi dhe Dashnor Sula janë lënë jashtë listave.
Me ironi, kreu i qeverisë thotë se Kujtim Gjuzi është përfaqësuesi me dinjitoz i Shqipërisë madhështore, ndërsa Sulën e krahasoi me epitetin e vjetër “gjel deti Peqini” për të cilin tha se e poshtëroi këneta.
“Një pjesë tjetër e komenteve lidhen me ditën e mbrëmshme kur u fol dhe u shpallën skuadrat që do të konkurrojnë më 11 maj. Kush po i voton? Janë disa që kanë hyrë në lista të sigurta se s’ja mban të përballen me popullin. Me siguri këtë duhet ta kesh pasur për Aleancën e Shqipërisë madhështore, sepse kush kishte ndonjë dyshim ose shpresë, mjafton të shohë skuadrën në listën e mbyllur të kryeqytetit. Skuadra në listën e mbyllur të kryeqytetit është tribuna VIP e kënetës. Doni të shihni kush janë personat VIP të kënetës, shikoni listën e mbyllur të kryeqytetit, ku mungon Kujtim Gjuzi, i cili po keqpërdoret, sepse është i vetmi që do ta kishte merituar aty në skuadrën e mbyllur. Për atë nivel që ka këneta, me ato mustaqe që ka Kujtimi, e meritonte. Ndërkohë që i madh Dash Sula, i cili nuk ka lënë gjë pa bërë për ta kapur një vend në tribun VIP, u la jashtë. Me sa mora vesh u arratis sepse nuk e përballonte dot këtë poshtërim që i bëri këneta dhe vazhdon të besojë së Shqipëria Bëhet. Në fund të ditës, Dash Sula, thuaj çfarë të duash, është gjel deti i Peqinit dhe nuk pajtohet dot këneta me të. Është tip i veçantë në llojin e vetë”, u shpreh Rama.
Kujtojmë që deputeti demokrat Dashnor Sula u la jashtë listave të Partisë Demokratike në Elbasan, duke e detyruar atë të largohet dhe t’i bashkohet koalicionit “Nisma Shqipëria Bëhet”
Sipas listës së depozituar në KQZ, Dashnor Sula është listuar i fundit në qarkun e Elbasanit, duke u future në këtë mënyrë në garë për të marrë një mandate deputeti në 11 Maj.
