Edhe sot pas pasojave penale që po vuajnë, dy gratë e intervistuara nga Inside Story nuk janë të qarta mbi situatën e tyre.
Strategji mbrojtje apo e vërtetë e kulluar, vështirë të thuhet, qëndrimi i tyre është se nuk kanë paramenduar asnjë veprimtari kriminale. Në mungesë të paramendimit, kërkojnë zbutjen e situatës së tyre me ligjin.
‘Kam qëndruar më shumë se një vit e gjysmë te burgu i grave, në Ali Dem, në paraburgim. Pastaj në arrest shtëpie.
Besoj se do të dalë e drejta, por nuk mund të mbaj unë përsipër gjërat që bëjnë të tjerët, ti marr unë, pasi jam prind.
Si një prind me fëmijë të parritur që duhet të punojë fëmija për prindin, si mund ta marrësh me mend, sidomos nëna’ u shpreh H.D, e dyshuara si organizatore
‘Të më kthehet jeta në normalitet të më kthehet karta. Pse të mos dal unë jashtë vendit, çfarë krimi kam bërë unë?’ u shpreh punëtorja e kanabisit
Shtetasja me inicialet D.H. është në një situatë më të vështirë pasi akuza e konsideron organizatore. Madje, siç zbuluam edhe më sipër komunikimet e saj me gratë që punuan në parcela të ndryshme ishin thelbësore në bashkimin procedimit dhe ngritjen e akuzës për grup të strukturuar. Por, dy zonjat nuk janë të vetmet që janë përfshirë në këtë histori. Dëshmitë e punëtoreve të tjera, kanë qenë thuajse në të njëjtën linjë. Inside Story sjell për herë të parë dëshmitë e tyre përpara togave të zeza.
“Jam telefonuar nga njerëz që nuk i njoh dhe së bashku me një grup grash kemi shkuar në Shkodër me autobus me qëllimin dërgimin e tyre në Malësi të Madhe për të punuar me sherebelë. Kur policia na gjeti kemi qenë duke pritur personin që do i udhëzonte për punën”. D.H
“Kam marrë dijeni nga disa shoqe se në Malësi të Madhe duan punëtore për sherebelë dhe paguajnë 20 mijë lekë dita. Nisur nga nevojat ekonomike kam pranuar. Jemi nisur me autobus nga Kamza në orën 05:00 dhe na ka çuar në Shkodër. Aty më pas kemi shkuar te shtëpia ku duhet të punonim dhe jemi kapur nga policia”. F.Gj
“Kam dëgjuar nga shoqet se vinte një furgon dhe merrte gratë nga Fushe Kruja për të mbledhur bimë medicinale në Shkodër. Duke qenë se kam katër fëmijë dhe vjehrrën e sëmurë në shtëpi, vetë isha pa punë, vendosa të shkoja të punoja”. V.H.
Pra, siç shihet dhe nga dëshmitë e grave, dallohet qartë se kanë ardhur nga qytete të ndryshme. Një pjesë janë nisur nga Kamza, kryesisht gratë që jetonin në Tiranë, nga Fushë Kruja, por nuk mungonin dhe nga zonat e tjera si Laçi, apo Lezha./ Inside Story
