Komisioni i Medias ka përzgjedhur 10 emra nga 68 kandidatë në total dhe ia ka dërguar për votim Kuvendit për anëtarë të Këshillit Drejtues të Radio Televizionit Shqiptar.
Mes emrave të përzgjedhur bëjnë pjesë personalitete të njohura nga fusha të ndryshme, duke përfshirë median, artin, ekonominë dhe studimet akademike.
Më konkretisht, bëhet fjalë për:
- Petrit Beci – Ish-drejtues i RTSH-së dhe producent me eksperiencë në median vizive.
- Rajmonda Bulku – Aktore e njohur dhe personalitet i rëndësishëm në skenën artistike shqiptare.
- Osman Mula – Kompozitor dhe producent me një kontribut të gjatë në muzikën shqiptare.
- Bujar Kapexhiu – Karikaturist, regjisor dhe një nga figurat më të njohura të artit shqiptar.
- Robert Budina – Regjisor dhe aktivist për lirinë e medias dhe të shprehjes.
- Eno Civici – Ekspert ekonomie dhe profesor universitar me një qasje analitike në menaxhimin e institucioneve publike.
- Alket Braho – Me eksperiencë në fushën e komunikimit dhe medias.
- Lorenc Vangjeli – Analist dhe gazetar me një karrierë të gjatë në fushën e informacionit.
- Pano Xhixho – Me kontribut në fushën akademike dhe atë të komunikimit publik.
- Zamira Kita – Aktore dhe personalitet i njohur në teatrin dhe kinematografinë shqiptare.
Gjithashtu, janë dërguar për votim në Kuvend dhe dy kandidatë për postin e kryetaerit të Këshillit Drejtues të RTSH-së, ku bëhet fjalë për Helidon Halitin dhe Fatjon Hoxhallin. Njëri prej tyre do të zëvendësojë Leka Bungon, tashmë të shkarkuar nga Kuvendi.
Këshilli Drejtues i RTSH-së me 11 anëtarë u shkarkua nga Kuvendi në seancën plenare të 17 Shkurtit, pas një dakordësie mes mazhoranëcs dhe opozitës, për shkak të shkeljeve ligjore në mënyrë të vazhdueshme në procesin e konkurrimit për drejtorin e ri të RTSH-së.
Emrat e rinj të 11 anëtarëve të Këshillit Drejtues të RTSH-së do të votohen në seancën plenare të së enjtes në Kuvend më 13 Mars.
