Tre muaj nga ngjarja e rëndë, e hedhjes me dron të një sasie tritoli në apartamentin me qera, ku jetonte Bernardo Sinomati, ky i fundit ende nuk është paraqitur në polici për të dhënë shpjegime.
Sinomati dhe e dashura e tij, Elena Arza, e cila ishte personi që kishte rezervuar apartamentin përmes një agjencie imobiliare, i janë shmangur në mënyrë të vazhdueshme thirrjeve të policisë së Tiranës, për tu paraqitur dhe dhënë shpjegime.
“Ora News” ka mësuar se përmes fletë-thirjes zyrtare dhe komunikimeve në telefon i është kërkuar Sinomatit dhe të dashurës së tij, që të paraqiten në polici për të dhënë shpjegime.
Por ka rezultuar se ata kanë injoruar këto kërkesa me argumentin se ndodhen jashtë shtetit dhe s’mund të vinin në Shqipëri, pasi i rrezikohet jeta.
Qëllimi i policisë është pyetja e tyre si persona që kanë dijeni për veprën penale të hedhjes së dronit me tritol në apartamentin, ku çifti jetonte me qera.
Sinomati dhe e dashura e tij Elena Arza, në muajin Dhjetor 2024 ishin objektiv i një sulmi me tritol në apartamentin e ndodhur në katin e 9-të të një pallati.
Sasia e tritolit ishte vendosur në një dron dhe shpërthimi ka ndodhur pikërisht duke future dronin në ballkonin e apartamentit.
Në qendër të sulmit të këtij atentati, dyshohet se ishte Bernardo Sinomati, një i ri nga qyteti i Vlorës, i cili u ka shpëtuar edhe dy herë të tjera sulmeve me tritol dhe armë.
Në hetime është përfshirë mundësia e lidhjes së kësaj ngjarje me atentatin që ju bë me armë rreth një javë më parë Kevin Hajrullës, mikut të familjes së Inez Hajrulla. kjo edhe për shkak të konflikteve të mëparshme mes tyre.
Tashmë ngjarja e rëndë është regjistruar në prokurorinë e Tiranës për akuzën e “Vrasjes me paramendim” kryer në bashkëpunim mbetur në tentativë dhe “Shkatërrim i pronës me eksploziv”.
Pas sulmit mësohet se Sinomati është larguar ndërsa ende nuk është gjetur për të dhënë sqarimet e tij.
Për të dhënë dëshmi është kërkuar edhe vajza që e kishte marrë ambientin me qira, por për shkak se ka deklaruar se është jashtë shtetit nuk është bërë e mundur paraqitja./ ORA NEWS
