Janë luajtur këtë të dielë 6 ndeshjet e javës së 27-të të Kategorisë së Parë, ku nuk kanë munguar as rezultate surprizë.
Vora kryesuese nuk shkoi më shumë se një barazim 1-1 në duelin përballë Apolonisë. Ekipi i drejtuar nga Arjan Bellai dukej se e kishte gjithë lojën nën kontroll dhe arriti të shënonte që në minutën e ‘8 me të përhershmin Ruzgis, por kur ndeshja po shkonte drejt fundit, fierakët arritën të befasonin, duke barazuar me një supergol të Trifonit.
Tri pikë me vlerë për Flamurtarin e vendit të dytë, që në Vlorë mposhti 2-1 Kastriotin me përmbysje. Krutanët shënuan me Hoxhën pas 3 minutave lojë, ndërsa në pjesën e dytë dhe më konkretisht në minutat ’77 dhe ’90 Shkurtaj dhe Pjeshka i dhanë djemve të Agostinelit tri pikë me shumë peshë.
Ndërkohë, Besa vazhdon të besojë tek elita, pasi ditën e sotme arriti të marrë një fitore me rezultatin e pastër 3-0 përballë Lushnjës. Golat e fitores u shënuan nga Migone, Goxha dhe Greca.
Në ndeshjet e tjera, Burreli ka blinduar vendin e katërt, pasi sot arriti të mposhtë me rezultatin minimal 1-0 Pogradecin. Golin për vendasit e shënoi Rrapi që në pjesën e parë të lojës.
Sukses shënoi edhe Kukësi që i dha tri pikë në debutim trajnerit Fatjon Tafaj, teksa mposhti me rezultatin e pastër 0-3 Erzenin. Fitore mori edhe Korabin përballë Valbonës.
Pas rezultateve të sotme, vendi i parë është në diskutim tashmë, pasi Flamurtari ndjek me vetëm 2 pikë më pak Vorën. Ndërkohë, Besa ka 7 pikë më pak se Flamurtari dhe ende shpreson për vendin e dytë. “Top 6” plotësohet me Burrelin, Lushnjën dhe Pogradecit.
Gara për mbijetesën po zhvillohet mes Kukësit dhe Korabit që kërkojnë t’i shpëtojë “play-out”. Të dyja skuadrat janë në ndjekje të Apolonisë dhe Kastriotit. Pa shpresa mund të quhen Valbona dhe Erzeni në fund.
REZULTATET
BESA 3-0 LUSHNJA
36′ Migone, 44′ Goxha, 62′ Greca
VORA 1–1 APOLONIA
8′ Ruzgis / 88′ Trifoni
FLAMURTARI 2–1 KASTRIOTI
69′ Shkurtaj, 90’+5′ Pjeshka / 3′ Hoxha
BURRELI 1–0 POGRADECI
13′ Rrapi
VALBONA 1–2 KORABI
88′ Balla / 33′ Zeqiri, 60′ Marku
ERZENI 0–3 KUKËSI
23′(p) Danaj, 51′ Grezda, 81′ Dragoshi
