Janë zbardhur detaje të reja nga vrasja e 24-vjeçares Rayyan Alwan, e cila u gjet e vrarë me thikë paraditen e 27 shkurtit, brenda një apartamenti me qira në Tiranë.
Autori i dyshuar i krimi është babai i saj, 49-vjeçari Fadi Alwan, i cili më 22 Shkurt, pasi ka vrarë vajzën e tij, krejt i qetë ka marrë një taksi, ku ka udhëtuar drejt Rinasit. Prej aty, ai ka marrë avionin për të fluturuar drejt Athinës në Greqi. Po në të njëjtën datë, më 22 Shkurt, ai ka marrë sërish avionin dhe ka fluturuar nga Athina drejt Amsterdamit në Holandë.
Burime për mediat bëjnë me dije se autoritetet gjermane, në kthim-përgjigjen për autoritetet shqiptare thonë se shkaku që dyshohet se mund të fshihet pas vrasjes së 24-vjeçares, është për çështje nderi.
Dyshohet se familja ishte në presion për ekzistencën e një video ku vajza e tyre shfaqej nudo. Në datën 26 shkurt, një ditë para se vajza e saj 24-vjeçare të gjendej e pajetë në një shtëpi me qira në Tiranë, nëna e saj ka bërë një kallëzim penal për zhvatje në Gjermani për këtë video.
Sipas nënës së Rayyan, prej dhjetorit 2024, ajo i kishte dhënë disa herë vajzës para për të paguar kërcënuesit që u kishte rënë në dorë video dhe vajza, pa praninë e së ëmës, i ka dërguar paratë përmes kompanive të transfertave, për të plotësuar kërkesat e shantazhuesit.
Megjithatë, në kallëzim, nëna e Rayyan nuk përjashton mundësinë që pas shantazhuesit të qëndronte vetë vajza e saj. Sipas nënës, Rayyan kishte fluturuar në Shqipëri së bashku me të atin Fadi Alwan, i cili nuk jeton me nënën e saj, më 19 shkurt 2025.
Aty dyshohet se vajza i tregoi babait videon dhe nëna pretendon se aty ka lindur një mosmarrëveshje mes babait dhe vajzës.
