Edhe kundër Bayernit të Mynihut, sulmuesi kryesor i Bayer Leverkusenit, Patrik Schick, e nisi nga stoli: ish-lojtari i Sampdorias dhe Romës u aktivizua vetëm në 10 minutat e fundit të ndeshjes.
Në Gjermani po flitet për një situatë që po fillon të shkaktojë njëfarë frustrimi tek ai, pasi nuk është hera e parë që në një ndeshje të madhe nuk është zgjedhja e formacionit, pavarësisht statistikave të tij të shkëlqyera në aspektin e golave.
Duke folur në konferencën për shtypin në prag të sfidës kundër Ëerder Bremenit, trajneri Xabi Alonso u pyet drejtpërdrejt mbi këtë çështje dhe komentoi:
“Përjashtimi i Schick kundër Bayern? Unë gjithmonë marr vendimet e mia për arsye taktike. Ky ishte vendimi im për të mërkurën. Ishte thjesht analiza ime mbi atë që na duhej për atë ndeshje,” tha ai.
Në prag të sfidës së nesërme, ish-mesfushori nuk dëshiron shpërqendrim për shkak të kthimit në Champions League: “Duhet të jemi profesionistë dhe të kuptojmë se nuk mund të mendojmë për të martën, por që fillimisht kemi ndeshjen kundër Werder Bremenit.
Pas humbjes të së mërkurës, përgatitja më e mirë është të luajmë një ndeshje të mirë dhe të kemi ndjesi pozitive.”
Më pas, ai u rikthye te humbja e rëndë në Champions dhe kritikat që pasuan:
“Nuk është diçka e re, nuk është hera e parë që marrim kritika dhe nuk do të jetë e fundit. Pas një humbjeje, por edhe pas një fitoreje, mund të ketë kritika. I pranoj kur janë për futbollin. Mund të mësoj edhe unë prej tyre. Ne gjithashtu bëjmë analizat tona për të kuptuar se çfarë mund të kishim bërë më mirë. Është diçka normale. Për mua nuk është problem.”
