Policia e Beratit ka arrestuar një vajzë, e cila akuzohet se shfrytëzonte dy motra për prostitucion.
Pas një hetimi për rreth dy muajsh, në kuadër të operacionit të koduar “Multiple” është vënë në pranga shtetasja S. K., 19 vjeçe, banuese në Berat.
Ndërkohë, autoritetet policore raportojnë se dy motrat që shfrytëzoheshin për prostitucion, shtetasja A. A., 19 vjeçe dhe motra e saj 15 vjeçe janë proceduar penalisht në gjendje të lirë.
Më tej, gjatë këtij operacioni, është arrestuar dhe shtetasi K. B., pasi nga hetimet dyshohet se vinte baste sportive, me celularë. Nga kontrollet, që uniformat blu kanë ushtruar në banesën e tij, kanë gjetur një shufër hekuri, një elektroshok, një shkop bejsbolli, dy maska dhe 7 celularë.
Gjithashtu, po në kuadër të operacionit “Multiple”, ka nisur procedimi në gjendje të lirë dhe për vëllanë e shtetasit K. B., shtetasin V. B. dhe për shtetasin B. E., 19 vjeç, pasi nga hetimet dyshohet se po ashtu dhe ata vinin baste sportive, me celularë.
Materialet procedurale iu referuan Prokurorisë së Beratit për veprime të mëtejshme.
