Marc-André Ter Stegen, portier i Barcelonës, ka njoftuar përmes rrjeteve sociale divorcin me bashkëshorten e tij, Daniela Jaehle, me të cilën u martua në vitin 2017. Ata kanë dy fëmijë së bashku.
Historia e dashurisë mes tyre filloi kur portieri gjerman luante në ekipet e të rinjve të Borussia Mönchengladbach dhe më vonë, Daniela, arkitekte me profesion, e shoqëroi Ter Stegen në transferimin e tij te Barcelona.
“Pas një reflektimi, unë dhe Dani kemi vendosur të ndjekim rrugë të ndryshme. Ky nuk ishte vendim i lehtë, siç mund ta imagjinoni, por të dy besojmë se është hapi më i mirë për ne. Qëllimi ynë është të bëjmë atë që është më e mira për fëmijët tanë, duke siguruar që ata të kenë një mjedis të qëndrueshëm dhe plot dashuri. Ne do të vazhdojmë të punojmë së bashku si prindër dhe të trajtojmë njëri-tjetrin me respekt dhe mirënjohje, ashtu siç kemi bërë gjithmonë”, shkroi portieri në postimin e tij.
Ter Stegen ka qenë jashtë fushave pas një dëmtimi të rëndë në gju që pësoi në fillim të sezonit dhe pritet të rikthehet vetëm në edicionin 2025/26.
