Marrja me aktivitet fizik siç është palestra është një nga rekomandimet kryesore për një jetë sa më të shëndetshme, por shpesh kjo mbart në vetvete edhe probleme siç janë dëmtime të ndryshme.
“Problemet më të shpeshta që ne shohim tek këta individë që ndjekin aktivitetet fizike, kryesisht personat që merren me palestër duke qenë se kanë probleme në mënyrën e trajtimit po themi në intensitetin e stërvitjes, probleme që vijnë nga mbingarkesa, siç mund të jenë dëmtimi i tendinave,, dëmtimi i ligamenteve, kryesisht problemet e supit, por ka dhe nga ato raste që bëjnë dëmtime akoma dhe më të mëdhaja si pasojë e sforcimeve në kohën e gabuar, siç mund të jenë dëmtimet në shtyllën kurrizore”, tha fizioterapisti Kleton Kadillari.
Një sport tjetër që shkakton dëmtime të rënda është edhe futbolli, ku shpesh problemet mund të duan një kohë shumë më të gjatë rikuperimi.
“Dëmtimet që na vijnë nga sportet që kanë kontakt fizik, pra siç është futbollli që në një traumë apo në një shtyrje me një sportist tjetër na vijnë me dëmtime më të rënda. Mund të vijnë me dëmtime si këputja e ligamenteve totale, mund të kenë dëmtime si ruktura muskulare ose këputja e muskujve. Dëmtime si çarja e menisqeve që është një strukturë që bën amortizimin e gjurit dhe këto janë zakonisht dëmtime që kanë kohë rikuperimi shumë më të gjatë sesa dëmtimet që mund të na vijnë nga palestra”, tha Kadillari per TV Klan.
Specialistët theksojnë se nëse me sporte të ndryshme mund të merret thuajse çdo grupmoshë, me palestrën duhet të bëjnë kujdes adoleshentët që të mos krijojnë sforcime të panevojshme.
