Izraeli ka bllokuar hyrjen e të gjitha mallrave dhe furnizimeve në Gaza. Zyra e Kryeministrit Benjamin Netanyahu tha se Hamasi deri më tani kishte refuzuar të pranonte një zgjatje të përkohshme të armëpushimit sipas një propozimi të të dërguarit të Presidentit amerikan Donald Trump, Steve Witkoff.
“Izraeli nuk do të lejojë një armëpushim pa lirimin e pengjeve tanë. Nëse Hamasi vazhdon refuzimin e tij, do të ketë pasoja të mëtejshme”, tha zyra e Netanyahut në deklaratë.
Një zëdhënës i Hamasit e quajti lëvizjen shantazh dhe “krim lufte” pas përfundimit të fazës së parë të marrëveshjes së armëpushimit dhe u kërkoi ndërmjetësve që të detyronin Izraelin të rifillonte furnizimin me ndihma. Grupi palestinez dëshiron që faza e dytë e marrëveshjes të vazhdojë siç ishte negociuar fillimisht, me lirimin e pengjeve dhe të burgosurve palestinezë dhe tërheqjen e forcave izraelite nga Gaza.
Zyra e Netanyahut tha se Izraeli kishte rënë dakord me një propozim të SHBA-së që armëpushimi të vazhdonte për rreth 6 javë gjatë periudhës së Ramazanit dhe të Pashkës. Sipas planit të Witkoff gjysma e robërve, të gjallë dhe të vdekur, do të lirohen ditën e parë, ndërsa pjesa tjetër do të lirohet nëse arrihet një armëpushim i përhershëm.
Bisedimet për fazën e dytë të armëpushimit midis Izraelit dhe Hamasit nuk kanë bërë asnjë përparim deri më tani dhe është e paqartë nëse ato do të rifillojnë. Faza e parë e armëpushimit që skadoi të shtunën ndaloi pesëmbëdhjetë muaj luftime në Rripin e Gazës dhe pa lirimin e 33 pengjeve në këmbim të afro 2000 të burgosurve palestinezë. Negociatat për fazën e dytë mbahen në Kajro, me zyrtarë izraelitë, të katarit, egjiptianë dhe amerikanë që punojnë për t’i dhënë fund luftës.
Ndërkohë, organizatat humanitare kanë thënë vazhdimisht se armëpushimi duhet të vazhdojë nëse duan të ofrojnë ndihmën e nevojshme për palestinezët në enklavën bregdetare, e cila është shkatërruar nga lufta.
