Gjykata e Posaçme ca caktuar masën e sigurisë “arrest shtëpie” për avokatin Bardh Koçi, i cili u prangos ditën e sotme pas urdhërit të SPAK.
Sipas SPAK, Koçi i ka kërkuar një personi një vlerë parash prej 4 mijë euro, kundrejt një leje ndërtimi, duke i thënë se do të ndërmjetësonte që personi në fjalë të përfitonte truallin e ndërtimit.
Prokuroria e Posaçme sqaroi se Bardhi Koçi me profesion avokat ka kërkuar nga shtetasja P.M. shumën prej 4000 (katër mijë) eurosh dhe ka marrë prej saj në formën e përfitimit të parregullt shumën paraprake prej 1000 (një mijë) eurosh, me qëllim ushtrimin e ndikimit në vendimarrjen e gjyqtarit, i cili po shqyrtonte çështjen në ngarkim të saj.
Ndërsa ndaj gruas P.M, SPAK ka caktuar masën e sigurimit personal “Detyrim për tu paraqitur në policinë gjyqësore” si e dyshuar për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike”.
Bardh Koçi është emër i njohur për policinë, pasi ai është arrestuar edhe në vitet 2013 e 2015.
Më tej Prokuroria e Posaçme, bëri me dije se pas caktimit te masës së sigurisë janë ushtruar dhe tre kontrolle në banesa të ndryshme.
Po ashtu SPAK njoftoi se kontrollet janë kryer në banesën e një oficeri të policisë gjyqësore, si dhe tek shtëpia dhe zyra e një eksperti.
“Gjithashtu në kuadër të hetimit të këtij procedimi penal me qëllim kërkimin e provave janë ushtruar kontrolle në banesat e katër shtetasve, mes tyre edhe në atë të një eksperti kriminalistik dhe një oficeri të Policisë Gjyqësore në Prokurorinë pranë Gjykatës së Shkallës së Parë të Juridiksionit të Përgjithshëm, Tiranë“, njoftoi SPAK.
Lexo edhe:
SPAK zbardh akuzën për avokatin Bardh Koçi: Kërkoi 4000 euro për të ndikuar tek gjyqtari
