Presidenti ukrainas Volodymyr Zelensky ka thënë se shpreson që lufta të marrë fund këtë vit në përvjetorin e tretë të pushtimit të plotë nga Rusia.
Ai paralajmëroi se Ukraina ka nevojë për garanci sigurie për të parandaluar kthimin e Moskës, duke sugjeruar se anëtarësimi në BE dhe NATO do të ndihmojë. Nga ana tjetër, Rusia e ka kundërshtuar vazhdimisht idenë e anëtarësimit të Ukrainës në NATO.
Më herët, Zelensky tha se një marrëveshje paqeje me Rusinë mund të fillojë me një shkëmbim “të plotë” të robërve të luftës.
Duke folur në një konferencë shtypi, Zelensky u pyet se cilat ishin shpresat e tij për Ukrainën dhe popullin e saj pas tre vitesh luftë.
“Shpresojmë se mund ta përfundojmë luftën këtë vit”, u përgjigj ai, duke shtuar se ka qenë “shumë e vështirë” për të gjithë kombin.
Pak ditë më parë, Zelensky tha se ishte i gatshëm të tërhiqej si president nëse Ukraina do të bëhej anëtare e NATO-s. Rusia tha se nuk do ta pranonte këtë si pjesë të ndonjë marrëveshjeje paqeje.
