Banorët e fshatit Tragjas në Vlorë prej kohësh kundërshtojnë projektin e Agjencisë Kombëtare të Ujësjellës-Kanalizimeve marrjemn e burimeve të ujit të fshatit për të furnizuar resortet në bregdetin e Dhërmiut.
Punimet për këtë projekt filluan në fillim të shkurtit, por komunitetit i kësaj zone nuk është pyetur fare, teksa zëri i banorëve nuk u dëgjua as prej protestave të zhvilluara prej tyre.
Ditën e sotme ata e kanë shpërngulur protestën në mbledhjen e Këshillit Bashkiak, ku një prej banorëve shprehet i revoltuar se “kuçedra” po iu merr ujin, jetën dhe po iu zë frymën, teksa hedh akuza edhe drejt kryebashkiakut të Vlorës, Ermal Dredha.
“Ne kemi ardhur se po na zë kuçedra ujin, po vjen kuçedra dhe po na zë frymën. Ndërkohë që ju zgjidhni problemet politike me njëri-tjetrin, ky popull këtu është demokrat, socialist, ballist, zogist, komunitet i zonës së Dukatit, Tragjasi, Orikum. Ne kemi ardhur të na zgjidhni problemin, sepse kryetari i Bashkisë ka dhënë në shkelje të ligjit, pa na pyetur fare, ka dhënë një leje ndërtimi dhe na ka bllokuar jetën, po na merr jetën. Për të bërë një fshat turistik andej ai, ça do bëjë dhe të më shpërngulë mua të më marrë jetën. Kjo është e padrejtë.” – shprehet një prej banorëve në mbledhjen e Këshillit Bashkiak.
Por, duket se pushteti nuk e ka fare ndërmend të merret me hallet e popullit, dhe jo vetëm që nuk i dëgjon, por shqetësohet nga zëri i tyre dhe iu përgjigjet me arrogancë.
Një prej këshilltareve të Partisë Socialiste, në videon e mëposhtme dëgjohet duke iu drejtuar banorëve me arrogancë: “Ça ke që bërtet mo, ça keni që bërtisni, se nuk iu le njeri pa ujë, jeni mirë nga mendja ju…”.
Por, një prej banorëve i përgjigjet se këshilltaren socialiste as nuk e njeh kush dhe as nuk e ka votuar kush.
