Në një intervistë ekskluzive për “Sportmediaset”, trajneri i Lacios, Marco Baroni, dërgoi një mesazh tek Interi për sfidën çerekfinale të Kupës së Italisë që do të luhet në “San Siro”:
“Ne duam të bëjmë mirë, shkojmë në Milano për të kaluar turin, jo thjesht për prezencë.
Nuk ka hakmarrje për 6-0, në një farë mënyre ajo disfatë na ka ndihmuar të shkundemi. Shkojmë me shumë përulësi në këtë ndeshje, por me identitetin tonë, të ndërtuar mbi ritëm dhe guxim. Duhet t’i mbetemi besnikë këtij identiteti”.
Në lidhje me mundësinë e përdorimit të një mesfushë me 3 lojtarë ndaj Interit, Baroni theksoi: “Është e mundur, por duhet të vlerësojmë, pasi edhe Dele-Bashiru do të mungojë”.
Ai shtoi se identiteti i ekipit do të thotë që të ruhet ekuilibri, pavarësisht nëse do të ketë një mesfushor më të thellë ose një lojtar më sulmues.
Baroni foli gjithashtu për kritikët pas barazimit 1-1 ndaj Venezias, duke thënë: “E pranojmë kritikën, por për mua ishte një ndeshje e pjekur, në këto lloj fushash nuk është e lehtë për askënd”.
Për sa i përket mungesës së Castellanos, ai shtoi: “Nuk duhet të jetë një justifikim, të gjithë duhet të japin më shumë. Pozita në klasifikim shihet në fund, ta bësh tani do të ishte një shpërdorim i panevojshëm energjish. Objektivat nuk ndryshojnë gjatë sezonit, për Juventusin, Milanin ose Atalantën ka qenë kështu, për ne jo. Ne duam të qëndrojmë aty ku jemi”.
