Kryediplomati rus Sergei Lavrov do të vizitojë Turqinë të hënën për të diskutuar bisedimet e fundit të vendit të tij me zyrtarët amerikanë për përfundimin e luftës në Ukrainë dhe se si Ankaraja mund të kontribuojë në këtë proces.
Lavrov dhe homologu i tij turk Hakan Fidan do të diskutojnë gjithashtu armëpushimin në Gaza dhe situatën në Siri, ku Turqia do të theksojë nevojën për unitet dhe dëbimin e terroristëve.
Një burim nga Ministria e Jashmte turke bën me dije se palët do të diskutojnë hapat drejt një paqeje të drejtë dhe të qëndrueshme nëpërmjet përpjekjeve diplomatike dhe kontakteve të fundit midis SHBA dhe Rusisë.
Negociatorët amerikanë dhe rusë u takuan në Riad javën e kaluar për të diskutuar përfundimin e konfliktit në Ukrainë, pa pjesëmarrjen e Kievit.
Në të njëjtën ditë, Presidenti ukrainas Volodymyr Zelenskyy u takua me Presidentin turk, Tayyip Erdogan në Ankara.
Turqia është përpjekur të balancojë lidhjet e mira me Ukrainën dhe Rusinë, fqinjët e saj në Detin e Zi, gjatë gjithë luftës dhe është pwrpjekur të luajë një rol ndërmjetësues.
Në vitin 2022, Turqia priti negociatat fillestare midis Rusisë dhe Ukrainës muaj pas fillimit të luftës.
