Gjykata e Posaçme e ka caktuar sot (21 shkurt) masën ‘arrest me burg’ për Petrit Lakatos, administratorin e biznesit të vëllezërve Çopja në Elbasan.
Ai ndalua tre ditë më parë (18 shkurt), si pjesë e grupit të vëllezërve Hajdar e Franc Çopja.
Lakatos dyshohet se pastronte paratë e organizatës kriminale, teksa SPAK njoftoi se kishte sekuestruar edhe kompaninë “Solis Farm”, një pikë agroturizmi në Mumajes të Baldushkut, në Tiranë, godinën dhe sipërfaqen e tokës në të cilën ky operator ekonomik ushtron aktivitetin.
Godina në fjalë përbëhet nga dy kate, kati i parë nga kuzhina, restoranti, ambienti i restorantit, veranda, etj., dhe kati i dytë i përbërë nga dy dhoma, sallon etj.
Në sekuestro janë vënë edhe pajisje e ambiente ndihmëse për aktivitetin e shërbimeve. Po ashtu, gjatë kontrollit personal ndaj Petrit Lakatos u gjetën dhe u sekuestruan 2940 euro, 203 mijë lekë të rinj, orë e markës luksoze ‘Rolex’, një varëse floriri me 3 diamante dhe 4 telefonë.
Vetëm një muaj më parë krerëve të organizatës kriminale të Çopjave, mes dhjetëra pasurive, SPAK u sekuestroi edhe 10 milionë $ në kripto, në bashkëpunim me policitë e disa shteteve, ku ata dyshohet se vepronin me trafikun e kokainës dhe pagesat i bënin me monedha virtuale.
Vendimi për sekuestrot është firmosur më datë 18 shkurt 2025 dhe po në të njëjtën ditë është arrestuar edhe administratori i ‘Solis Farm’, Petrit Lakatos për tre akuza; “pastrimi i produkteve të veprës penale ose veprimtarisë kriminale”, “organizata kriminale” dhe “kryerja e veprave penale nga organizata kriminale dhe grupi i strukturuar kriminal”.
- Pasuritë e sekuestruara
-Pasuria e paluajtshme në Mumajes, Baldushk, (pjesë e OE-së “S. FARM”)
-Godinë shërbimesh restorant; kati i parë përbëhet nga kuzhina, restoranti, ambienti i restorantit, veranda, etj dhe kati i dytë i përbërë nga dy dhoma, sallon etj
-Oborri (hapsira rreth ndërtesës) në të cilën gjenden tavolina dhe karrige shërbimi, një kënd lojërash për fëmijë, një ambient ku mbahen shpendë të ndryshëm
-Dhomë shërbimi jashtë restorantit
-Sendet dhe orendi, të ndodhura në restorant
-Gjatë kontrollit personal të ushtruar ndaj Petrit Lakatos., u gjetën dhe sekuestruan në cilësinë e provës materiale
-Shuma monetare në valutë euro 2940 (dy mijë e nëntëqind e dyzet)
-Shuma monetare në monedhë Lekë (ALL), në total 203,000.00 (dyqind e tre mijë)
-Orë dore, marka Rolex
-1(një) varëse floriri, me pllakë në dukje me përbërje floriri, pas të cilës është gdhendur data 29.09.2022, ndërsa në pjesën e përparme janë të vendosura dhe 3 (tre) gurë të çmuar, në dukje diamante
-4 (katër) telefona, etj.
