Kutitë e votimit vijojnë të numërohen në Kosovë, teksa sipas KQZ deri më tani janë numëruar rreth 78% të qendrave të votimit për votat e kandidatëve në zgjedhjet parlamentare të 9 shkurtit.
Dhe procesi i numërimit ka nxjerrë surpriza. Një ndër to është këngëtarja e njohur Edona Llalloshi, me të cilën u befasuan të gjithë kur Albin Kurti e bëri pjesë të listës së kandidatëve.
Ajo mbante numrin 19 në listë dhe sipas mediave në Kosovë deri më tani ka siguruar një numër të konsiderueshëm votash, në krahasim me emra të tjerë të njohur në radhët e Vetëvendosjes.
Edona Llalloshi pritet të ketë rreth 30 mijë vota, një rezultat ky befasues për një kandidate që vjen nga fusha e artit. Me votat e numëruara deri më tani, këngëtaren rezulton se e kanë votuar 26765 qytetarë të Kosovës.
Mbetet të shihet nëse këngëtarja do të arrijë të sigurojë një ulëse në Kuvend, por ky rezultat i deritanishëm dëshmon për një përkrahje të madhe që ajo ka fituar në këtë garë politike.
Sa i përket kandidatëve të tjerë të Vetëvendosjes, Albin Kurti është më i votuari me 222 mijë vota. Pas tij vjen Glauk Konjufca me 170 mijë vota. Faton Peci ka marrë vota si i treti me 84 mijë vota.
Pas Pecit, vjen Hekuran Murati me 80 mijë, Albulena Haxhiu me 76 mijë, Xhelal Sveçla me 72 mijë e Donika Gërvalla me 68 mijë. Mandatit e deputetit e ka siguruar edhe Avni Dehari që është votuar 58 mijë herë, si dhe Mimoza Kusari-Lila që ka marrë mbi 50 mijë vota.
