Një festë e kthyer në tragjedi! Ky “Shën Valentin” rezultoi fatal për çiftin Zef Sinani dhe Megi Xhetani, përkatësisht 34 dhe 20 vjeçe, të cilët kishin vetëm 3 muaj të fejuar së bashku.
Ata kishin shkuar për ta festuar “Shën Valentinin” në Pogradec dhe të kalonin një ditë të veçantë, por kthimi rezultoi fatal për ta. Automjeti me të cilin udhëtonin, tip “Mercedes Benz” me targa “AA 716 KS”, u përplas me një kamion me targa të Maqedonisë së Veriut, në aksin Prrenjas-Librazhd. Aksidenti tragjik ndodhi në mesnatë, gjatë orës 00:10, pranë fshatit Pishkash.
Si pasojë e aksidentit, 20-vjeçarja Megi Xhetani, e cila ishte pasagjere në automjet, humbi jetën në vendin e ngjarjes.
Ndërkohë, i fejuari i saj, i cili ishte drejtuesi i automjetit, mbeti i plagosur rëndë dhe fillimisht u dërgua në spitalin e Librazhdit dhe më pas në Spitalin Rajonal të Elbasanit. Por, për shkak të gjendjes kritike për jetën, bluzat e bardhe vendosën ta dërgonin tek spitali i Traumës në kryeqytet për mjekim më të specializuar.
Burime bëjnë me dije se çifti jetonte në qytetin e Mamurrasit, ndërsa viktima ishte vajzë e vetme në familje dhe studionte në Universitetin e Tiranës.
Siç shihet edhe nga pamjet, përplasja ka qenë e fortë, teksa makina është goditur në krahun e pasagjeres, përplasje që rezultoi fatale për të renë.
Nga hetimet paraprake dyshohet se shkaku i aksidentit mund të ketë qenë shpejtësia e lartë, tej normave të lejuara, në një kthesë të fortë në Pishkash. Kjo ka bërë që 34-vjeçari të hubë konktrollin mbi drejtimin e automjetit të tij.
Grupi hetimor po punon me mbledhjen e provave dhe dokumentimin e plotë të ngjarjes për të përcaktuar shkaqet e sakta të përplasjes tragjike.
Mësohet se 34-vjeçari Zef Sinani vijon të jetë ende në gjendje kritike për jetën, ndërsa trupi i pajetë i 20-vjeçares Megi Xhetani është dërguar në morgun e spitalit të Elbasanit.
