Është zbardhur identiteti i të resë që humbi jetën në aksidentin tragjik të regjistruar mesnatën e kaluar, rreth orës 00:10 në aksin rrugor Prrenjas-Librazhd, pranë fshatit Pishkash.
Burime bëjnë me dije se viktima është shtetasja Megi Xhetani, rreth 20 vjeçe. Ajo ishte pasagjere në automjetin tip “Mercedes Benz”, me targa “AA 716 KS”, që drejtohej nga i fejuari i saj, 34-vjeçari Zef Sinani.
Ky i fundit ka mbetur i plagosur dhe ndodhet në gjendje kritike për jetën, ku pasi u dërgua fillimisht në spitalin e Elbasanit, bluzat e bardha vendosën ta dërgonin në spitalin e Traumës në kryeqytet për mjekim më të specializuar.
Makina me të cilën udhëtonin çifti i të rinjëve u përplas nga një kamion me targa të Maqedonisë së Veriut. Siç shihet edhe nga fotot, përplasja ka qenë e fortë, teksa makina është goditur në krahun e pasagjeres, përplasje që rezultoi fatale për të renë.
Nga hetimet paraprake dyshohet se shkaku i aksidentit mund të ketë qenë shpejtësia e lartë, tej normave të lejuara, në një kthesë të fortë në Pishkash.
Grupi hetimor po punon për zbardhjen e plotë të rrethanave të aksidentit.
