Është zbardhur identiteti i të riut që hapi zjarr mbrëmjen e sotme, ndaj efektivëve të Policisë së Tiranës, pranë Rinasit. Burime bëjnë me dije se bëhet fjalë për shtetasin Klajdi Buza, rreth 33 vjeç, një person me precedent penal.
Mësohet se autoritetet policore kishin marrë informacion se Klajdi Buza ishte i armatosur dhe u organizua operacioni për kapjen e tij në afësi të zonës së Rinasit.
Por, në momentin që uniformat blu i janë afruar, i riu ka qëlluar me armë zjarri në drejtim të policisë duke u rrezikuar jetën. Fatmirësisht nuk ka patur persona të lënduar, teksa pas të shtënave, 33-vjeçari është arrestuar nga Policia.
Klajd Buza është arrestuar në dhjetor të vitit 2022 në Fushë-Krujë, pasi u kap duke qarkulluar me mjetin tip “Porsche”, teksa me vete kishte një armë zjarri pistoletë me fishekë në fole gati për qitje.
Ndërkohë në vitin 2015, ai denoncoi vjedhjen e makinës së tij, ndërsa policia në atë kohë njoftoi se mjeti ishte gjetur i braktisur në vendin e quajtur ura e Gjoles në Fushë Krujë.
Ai konsiderohet si një person, i cili është përfshirë edhe në disa konflikte.
