Prej muajit janar 2025 janë shtrenjtuar nga 24 deri në 60% çmimet e lëndëve ushqyese të kafshëve në blegtori, që hyjnë nga vendet e rajonit.
Fermerët dhe agronomët pohojnë se sivjet në tërësi është shënuar rritje e ndjeshme e lëndëve ushqyese për kafshët.
Konkretisht çmimi i misrit nga 27 lekë/kg që tregtohej më parë, aktualisht po blihet 34 lekë/kg. Rritja 26%. Çmimi i himeve nga 22 lekë/kg bëhet në 29 lekë/kg. Rritja është 24%.
Çmimi i elbit nga 25 lekë/kg bëhet në 33 lekë/kg. Rritja 32%. Ndërsa çmimi i jonxhës nga 500 lekë që tregtohej në periudhën maj-qershor, aktualisht është 700-800 lekë/dengu. Rritja varion nga 40 deri 60%.
Ardit Bali agronom në Lushnjë thotë se shtrenjtimi i çmimeve të lëndëve ushqyese ka rritur koston e mbajtjes së kafshëve në blegtori dhe pritet të ndikojë në reduktimin e krerëve në ferma.
“Shtrenjtimi i lëndëve ushqyese për kafshët ka rritur koston e mbajtjes së fermave. Ndërsa për shkak të shtimit të sasisë së qumështit të importit nga fabrikat përpunuese, fermerët nëse do të rrisnin çmimin e shitjes së qumështit do t’u mbetej pa shitur. për rrjedhojë shtimi i kostove për mbajtjen e bagëtive rrezikon uljen e krerëve të kafshëve veçanërisht në fermat e vogla dhe të mesme dhe rënien e prodhimit të qumështit”, pohon ai.
Lëndët e para ushqyese për kafshët që kanë pësuar rritje importohen kryesisht nga Serbia dhe Maqedonia e Veriut, duke prekur edhe fermerët e zonave të tjera të vendit.
Xhevair Alushi fermer në fshatin Zall-Herr të Tiranës tha se rritja e çmimeve për himet dhe jonxhën ka nisur që prej muajit janar. Zotërues i 6 krerëve lopë tha se rritja e çmimeve të lëndëve ushqyese ka shtuar koston për mbajtjen e kafshëve, ndërsa nuk parashikon të shtrenjtojë çmimin e shitjes së qumështit. Por sipas tij rritja e kostove mund të ndikojë në uljen e numrit të krerëve të lopëve.
Sipas të dhënave të INSTAT në 2023 ishin 232,54 mijë lopë. Krahasuar me 2022 numri i tyre ra 11%.
Në 2023 gjithsej numri i gjetheve në rang vendi arriti në 263 mijë. Krahasuar me 2022 numri i tyre ra 11,5%. Ndërsa numri i të imtave dele/dhi për 2023 ra me 11,7% krahasuar me 2022.
Sakaq fermerët me shtrenjtim të lëndëve të para u përballën edhe përgjatë 2022, për shkak të rritjes së çmimeve të lëndëve të para në tregjet e huaja pas nisjes së luftës në Ukrainë.
Shtrenjtimi i çmimeve të lëndëve të para shtoi koston e prodhimit dhe e ktheu të paleverdishme punimin e tokës. Nga përfaqësuesit e fabrikat e përpunimit të qumështit u ngrit shqetësimi për rënie të prodhimit, i ndikuar edhe nga fenomeni i emigracionit, veçanërisht të fermerëve të vegjël që rrisnin 1 apo 2 lopë. Ndërsa numri i fermave të mëdha u rrit, por numri i tyre ishte shumë më i vogël krahasuar me fermerët e vegjël dhe nuk arrinte të ekuilibronte sasinë e qumështit të prodhuar në treg.
Për 2022 te shtimi i kostos për mbajtjen e kafshëve ndikuan edhe ndryshimet fiskale që nisën zbatimin nga 1 janari, si heqja e TVSH-së 6% të rimbursuehsme që u zëvendësuan me skemat e mbështetjes në bujqësi dhe vendosja e TVSH-së 10% te inputet bujqësore nga zero që ishin. /Monitor
