Joao Felix u transferua në formë huazimi ditën e fundit të merkatos nga Chelsea te Milan. Portugezit i kanë mjaftuar pak minuta në fushë për të gjetur golin e parë me kuqezinjtë në debutim, duke fituar kështu shpejt dashurinë e tifozëve.
Ndërkohë, pas eliminimit të Chelsea-s nga Brighton në FA Cup, trajneri i “Bluve” u pyet nëse atyre po i mungonte Joao Felix, Enzo Maresca befasoi me përgjigjen e tij.
“Nuk na mungon Joao Felix. Ai është i lumtur te Milan-i dhe ne jemi të lumtur që Joao është i lumtur atje”, tha Maresca. Ky koment i teknikut italian erdhi pas shumë kritikave të tifozëve për sulmuesit e Chelsea-s, të cilët zhgënjyen plotësisht me paraqitjen e tyre mbrëmë ndaj Brighton.
Kujtojmë se Joao Felix u transferua verën e vitit 2024 te “Blutë” për 52 milionë euro, por nuk arriti të bëhej pjesë e formacionit titullar të Maresca-s, ndaj dhe zgjodhi huazimin te Milan.
