Vllaznia do të presë Bylisin në ndeshjen e javës së 24-t të Superiores, me duelin që do luhet të dielën në orën 17:00, në stadiumin “Loro Boriçi” të Shkodrës. Një sfidë ku kuqeblutë e drejtuar nga Brdariç kërkojnë fitoren dhe përballë tifozerisë së tyre nuk lejohen gabimet.
E, në krahun tjetër, mallakastriotët që duan reagimin pas 3 humbjeve radhazi mes Kupës dhe kampionatit, ku në Superiore, ekipi i Dedes është në një garë të ashpër për mbijetesë.
Vllaznia vjen në këtë ndeshje me disa dilema përsa i përket formacionit, që lidhen kryesisht me disa emra të veçantë që mund të ndryshojnë planet e Brdariç. Në portë, si zakonisht në këto javë, pritet ta nisë Jukaj, i cili po bind nga dueli në duel me fanellën kuqeblu.
Nga krahët e mbrojtjes Gurishta djathtas dhe Jago majtas priten të sigurt në formacion. E ndërsa dilema në prapavijë mbetet nëse do rreshtohen dyshja Stojanoviç-Bajrami apo Krymi-Bajrami. Kjo pasi serbi ka shfaqur një problem të lehtë fizik, që e la edhe jashtë ndeshjes ndaj Elbasanit në Kupë, por me shumë mundësi do jetë në fushë ndaj Bylisit.
Nëse Krymi do aktivizohet në rolin e mbrojtësit të qendrës, do jetë Mala ai që do zbresë në mesfushë, me prizrenasin që së bashku me Deliun dhe Salën do formojnë treshen e këtij reparit. Megjithatë, nëse gjithçka qëndron sipas planeve, Esat Mala do aktivizohet në krahun e djathtë të sulmit, ku, me Balajn dhe Dodajn, do të formojnë treshen sulmuese. Kështu, i sakrifikuari në këtë rreshtim do jetë Çoba, me mëngjërashin që mund ta nisë nga stoli duelin e javës së 24-t në Superiore.
